Mandi Air Masin

Masa dulu masa kanak-kanak aku suka ni mandi aing masin ah, biasa kan kanak-kanak, mana beingau kan apa-apa.  Ramai lah dangan-dangan ku dulu mandi aing masin ani.  Bila balik sekolah saja, buka seluar buka baju makai spendat saja tarus terajun ke aing, ramai-ramai tah kami tu mandi sampainya kena marahi baru beranti.  Habis paip urang lain patah mematah dulu time mandi atu, mana tah jua luan kan begantung saja.  Sudah patah inda lagi mengakun sorang-sorang. 

Ada sekali atu kami kana takuti oleh orang tua-tua, yang di bawah atu ada 'galap' iaitu sejenis aing bepusing kira macam hantu lah tapi ani aing.  Inda kami mandi lagi lapas atu, tapi sudah seminggu kami inda mandi atu boring ta jua kami ani, kami liat satu 'galap' pun inda ada.  Kami fikir menipu lah orang tua atu, jadi start atu tah kami mandi aing masin lagi, kadang-kadang malam jua kami mandi ani, tapi malam selalu jua kami kana marah takut hilang laa apalaa.  Jadi inda tah kami mandi malam lagi pasal atu.

Tapi ada suatu hari atu, kami ada mendangar ada orang mati lemas di kampong, behampiran rumah kami jua, kana bagitau 'galap' yang menarik, tapi kata kami inda jua ada.  Mendusta ni urang tua-tua ani.  Kami fikir yang orang lamas atu inda berenang yata lamas.  Kami inda jua kira, tatap jua kami mandi aing masin mun luan siuk sudah kan. 
Sudah atu, ada kawan ku ani mengaga waktu malam kan membawa mandi aing masin, ramai durang sudah berkumpul, tapi di bagitau mama kan bejalan ke surau.  Jalan tah kami ani ke lagun sebalah, mandi, siuk-siuk kami mandi.  Kami ada kedengaran bunyi macam angin di belakang kami ani, kuat bunyi nya, macam mengaga kami ada jua.  Kami toleh inda ada, kami biarkan dulu mula-mulanya, pastu kedengaran tah kami lagi yang bunyi atu semakin hampir, baik jua masa atu kami semua di tangga, naik kami tarus ke tangga, sudah kami liat dari atas, ada aing bepusing-pusing di bawah hampir banar sudah sama kami.  Pasal luan takut sudah kami pun balik lah. 

Tapi apanya orang, kami ani inda merati jaralah.  Isuknya mandi jua kami masih, tapi ani petang kami mandi ani, kan maghrib sudah, dibelakang rumah ku.  Dalam siuk kami mandi atu, ada kawan ku ani buat-buat macam ia kana tarik, kami selamatkan rupanya ia menipu, sampai 3 kali ia buat cematu. 
Sudah kali keempatnya aku pulang yang kana tarik, tapi aku main-main masatu atu, aku minta tulung tapi inda kana selamatkan.  Sampainya aku timbul-tenggelam, lamas inda lagi tahan, aku pun biarkan saja.
 Sudahnya aku sadar, aku atas katil bilik ku.  Mama ku bagitau yang aku lamas.

 Yang pastinya aku kana tarik masatu.  Baik jua aku inda mati.  ALHAMDULILLAH..