Terlanggar 'sesuatu'

Ini kejadian ku masa kemarin.  Mulanya aku dan kawan ku berwhatsapp kan berjalan malamnya, main pool di fullcan.  Jadi kami start betext dalam pukul 3pm atulah.  Text punya text, 3 urang ganya kakal yang menjawab ani, jadi aku pun bagitau kalau limpas pukul 5 inda membalas pat group whatsapp kami atu, ertinya inda ikut.  Lapastu pukul 5 masih jua nada, aku pun main bula dulu di sungai asam.  Kami berjanji bejalan dalam pukul 7.30pm.

Dan lepas main bula, aku balik rumah tarus ku liat handphone ku, banyak jua bah text durang ani, ada dalam 500++ text ani.  Malas kan membaca, tarus ku mandi dan siap.  Aku pun kerumah kawan ku ni, dan tarus jua mengaga kawan yang seorang lagi yang minta ambil di tempat bomba sungai lampai.  Dan lepastu, habis semua di aga, kami pun jalan, tapi balum jua ke tarus ke fullcan, ke giant kami lagi, Rimba ah.  Meliat barang batah tapi yang di bali numan sama keropok ganya, tantu pulang membali di kadai kaling, dan lapas tu kami pun ke fullcan untuk bermain pool.  Sudah sana, membuka meja pool no.10..  Open saja inda bagitau berapa jam ni.  Siuk main sudah diliat jam ani kul 12, nah $15 membayar tapi inda apa puas hati main.  Dan sudah atu balik tah jua kami ani.

Sudahnya balik kami ani, ngantar durang yang lain, tinggal tia aku ani sama kawan ku yang driver ani ma adi nya sal kami ni sekampong jua, balik ja di kampong rupanya ada gambus.  Kedengaran bunyinya bah di perahu, naik ja di lagun kami tu, aku macam terlanggar sesuatu tapi masa tu nada papa.  Ku sumpah kan macam 'buduh'.  Tapi terfikir jua ku masa nyumpah atu, apa yang ku langgar ah sampainya badan ku terasa macam kebelakang sekajap atu.  Inda ku ingau jua, aku pun menuju lah kerumah kawan ku ani.  Si Alley.  Duduk dirumahnya sekajap, meliat urang menari dari jauh, atu ya macam-macam nyamu gaya durang atu, tapi ok lah, ada jua yang kan di ketawakan.  Dan lepas, kira-kira dalam pukul2 aku ni kan balik kerumah, berdiri ku sudah ni, tapi teduduk balik macam bahu ku barat rasa nya berdiri ah.  Makin ku bediri makin barat rasanya, makin paning pulang lah kepala.  Jadi ku inda jadilah balik, masih jua ku dirumah si Alley ni.

Sampai abis gambuslah jua, kira-kra pukul 3 lalu baru tah ku balik kerumah, tapi dalam perjalanan balik atu, lagi sekali aku macam terlanggar sesuatu lagi, tapi yang hairannya aku inda nampak benda yang ku langgar atu, jadi ku jalan lagi, kira-kira alat sebuah rumah lagi kan datang rumah ku, telanggar ku lagi.  Tapi kali ani nampak ku, orangnya memakai pakaian hitam tapi mukanya inda nampak, tarus menuju ke kawasan patang, ku tantang banar-banar, rasakan di aga ada jua.  Tapi ijap jua ku hantu kan, inda ku jadi.  Tarus ku masuk kerumah, dibilik ku tidur kepala ku paning.  Sudah paginya ni nah damam ah.  Leher sakit payah bercakap.  .v.